Ademola Lookman është objektivi kryesor i Interit për sulmin. Kalimi i tij te skuadra nga Milano nuk është ende i mbyllur, por ka avancuar ndjeshëm. Lojtari ka shprehur vullnetin e tij për t’u transferuar te nënkampionët, ndërsa marrëveshja për kontratën personale është arritur. Problemi aktual mbetet dakordësia mes dy klubeve.
Interi ka paraqitur një ofertë prej 40 milionë eurosh, e cila mund të rritet edhe me disa milionë të tjerë për të përmbushur kërkesat e Atalantës. Një takim mes përfaqësuesve të futbollistit dhe drejtuesve të Atalantës pritet të zhvillohet për të konfirmuar pozicionin e Lookman, i cili nuk e sheh veten më pjesë të projektit të klubit bergamask. Nga ana e tyre, agjentët e lojtarit po i kujtojnë Atalantës premtimin e bërë një vit më parë, sipas të cilit nuk do të pengonin largimin e tij në rast se do të vinte një ofertë e kënaqshme.
Aktualisht, Lookman po përballet me një problem muskulor në pulpë që e ka detyruar të stërvitet i diferencuar dhe pritet të mungojë edhe për disa javë. Megjithatë, dëshira e tij për t’u transferuar te Interi është e qartë dhe e shprehur hapur.
