Vllaznia vazhdon punën për afrime në merkato dhe synojnë përforcime në mbrojtje. Sipas “Shkodra Sport”, shkodranët kanë nisur bisedimet me mbrojtësin haitian François Dulysse.
Drejtuesit e klubit kuqeblu e kishin synuar 27-vjeçarin edhe gjatë vitit të kaluar, por në atë kohë lojtari zgjodhi të luante jashtë vendit.
Tashmë kontaktet mes palëve janë riaktivizuar dhe po diskutohen kushtet e një bashkëpunimi të mundshëm për edicionin e ri. Në të kaluarën e tij në Shqipëri, Dulysse ka mbajtur veshur fanellën e Egnatias, ekip me të cilin u shpall kampion.
Së fundmi, shtatlarti haitian ka qenë pjesë e skuadrës Hapoel Hadera në kampionatin izraelit. Pavarësisht kontakteve të vazhdueshme, për momentin nuk ka ende një akord përfundimtar mes lojtarit dhe klubit shkodran.
E ardhmja e mbrojtësit pritet të qartësohet gjatë ditëve në vijim pas përfundimit të negociatave.
