Hull City ka siguruar rikthimin në elitën e futbollit anglez pasi mposhti Middlesbrough në finalen e fazës “Play-Off” të Championship. Ky duel u mbyll me rezultatin minimal 1-0 në favor të skuadrës vendase, sukses i cili u garanton atyre pjesëmarrjen zyrtare në Premier League për edicionin e ardhshëm 2026-27.
Ky objektiv i arritur sjell një tjetër emër shqiptar në elitën e futbollit ishullor, duke rritur numrin e lojtarëve kuqezi në këtë kampionat të rëndësishëm.
Pjesë e këtij suksesi me ekipin e Hull City-t është edhe mesfushori 19-vjeçar, Aidon Shehu. Ndonëse lojtari i talentuar ende nuk ka pasur mundësinë të bëjë debutimin zyrtar me ekipin e parë gjatë këtij sezoni, aktivizimi në elitë mund t’i vijë përgjatë vitit të ardhshëm, gjithmonë nëse menaxhimi i klubit nuk do të ketë plane të tjera si një huazim të mundshëm për rritjen e tij profesionale.
Në rast se qëndron në skuadër, mesfushori do të gjejë në Premier League një tjetër futbollist shqiptar, Anis Mehmetin, i cili po ashtu arriti të ngjitej në elitë me skuadrën e Ipswich Town.
Sa i përket karrierës në nivel ndërkombëtar, Aidon Shehu është aktualisht pjesë e Kombëtares Shqiptare U-21. Me përfaqësuesen e shpresave kuqezi, ai ka regjistruar deri më tani 8 paraqitje zyrtare në fushën e lojës dhe ka arritur të shënojë 1 gol. Eksperienca në elitën angleze pritet të shërbejë si një shtysë e madhe për ecurinë e tij, si me klubin ashtu edhe në radhët e ekipeve kombëtare të moshave.
