Sulmuesi Redon Xhixha ka vendosur përfundimisht të ardhmen e tij, duke zgjedhur të qëndrojë te skuadra e Tiranës.
Pavarësisht ofertave të shumta që mori nga klube të ndryshme të Superiores dhe nga kampionate të huaja, lojtari pranoi propozimin e fundit të bardhebluve.
27-vjeçari ka firmosur një kontratë të re dyvjeçare me kryeqytetasit, ku do të vijojë të mbajë edhe shiritin e kapitenit.
Ky vendim u jep fund dilemave dhe siguron një element cilësor në repartin e avancuar për rindërtimin e skuadrës gjatë kësaj vere. Për Xhixhën kjo lëvizje sjell qëndrueshmëri pas një periudhe të vështirë aktivizimi në kampionatin algjerian.
Kujtojmë që aventura e tij në Afrikën e Veriut u mbyll në dyert e FIFA-s, ku sulmuesi fitoi gjyqin për rreth gjysmë milioni euro paga të prapambetura. Tashmë, kapiteni pritet të jetë pika e referimit për objektivat e reja të klubit më të titulluar në vend.
