Vllaznia ka pësuar një goditje të rëndë nga Komisioni Disiplinor i FIFA-s, i cili ka vendosur bllokimin e menjëhershëm të merkatos së kuqebluve si në nivel kombëtar, ashtu edhe në atë ndërkombëtar.
Shkak për këtë penalizim është bërë mosshlyerja e detyrimeve financiare në vlerën e rreth 84 mijë eurove ndaj “FIFA Clearing House”, që lidhen me taksat e formimit për transferimin e mesfushorit Eslit Sala nga Valletta në vitin 2023.
Megjithëse drejtuesit shkodranë tentuan të mbroheshin duke argumentuar probleme administrative me sistemin TMS dhe vështirësi të përkohshme ekonomike, institucioni botëror i futbollit i hodhi poshtë këto pretendime.
Përveç bllokimit të regjistrimit të lojtarëve të rinj, Vllaznia është gjobitur edhe me 10 mijë dollarë të tjerë. Ky vendim mbetet ekzekutiv deri në momentin që klubi të pastrojë të gjitha borxhet e prapambetura.
