Sulmuesi i Kombëtares shqiptare, Jasir Asani, ka reaguar përmes rrjeteve sociale për të sqaruar situatën e tij te klubi iranian, Esteghlal.
Pas shumë zërave për një largim të mundshëm gjatë kësaj merkatoje, Asani konfirmoi se do të vijojë të qëndrojë te Esteghlal.
Ai bëri të ditur se ka zhvilluar një bisedë me trajnerin e skuadrës dhe se të dy palët janë dakord për të luftuar deri në fund për objektivat e klubit.
Ish-lojtari i Partizanit siguroi mbështetësit se nuk ka ndërmend të transferohet në asnjë ekip tjetër, duke kërkuar njëkohësisht mbështetjen e tifozëve për të treguar vlerat e tij më të mira në fushë.
“Tifozë të dashur dhe besnikë të Esteghlalit,
Ditën që mora ofertën e Esteghlalit, ndjeva pasionin dhe entuziazmin tuaj, zgjodha këtë ekip me gjithë zemër për të qëndruar pranë jush dhe për të luftuar për suksesin.
Këto ditë kam dëgjuar thashetheme të ndryshme për largimin tim, por e vërteta është se kam folur me trajnerin dhe i kemi premtuar njëri-tjetrit se do të luftojmë së bashku për qëllimet tona, përkrah jush dhe me mbështetjen tuaj.
Jam këtu për dashurinë dashurisë suaj dhe do të qëndroj me Esteghlalin derisa të arrijmë një sukses të madh. Nuk do shkoj askund.
Ju kërkoj vetëm të vazhdoni ta mbështesni ekipin, lojtarët dhe trajnerin tonë, i cili punon pa u lodhur dhe me pasion çdo ditë. Besoni tek unë, së bashku do të kemi sukses. Vetëm Esteghlal”, ka shkruar në postimin e tij.
