Ernest Muçi ka lënë gjurmë te Trabzonspori këtë sezon, duke u shndërruar në një nga lojtarët më të lakuar në Turqi.
Pas një viti të vështirë te Beshiktashi, fantazisti shqiptar rilindi plotësisht, duke u bërë protagonist kryesor në rikthimin e Trabzonsporit në krye.
Megjithatë, pavarësisht formës së tij të jashtëzakonshme, e ardhmja e tij duket se nuk do të jetë më në Trabzon.
Sipas raportimeve të fundit, klubi turk ka vendosur të mos ushtrojë klauzolën për blerjen përfundimtare të kartonit të tij. Mediat vendase bëjnë me dije se ky vendim vjen edhe si rrjedhojë e dëshirës së vetë futbollistit.
Muçi, i cili gjeti shkëlqimin e munguar këtë edicion, synon një rikthim te Beshiktashi për të treguar vlerat e tij aty ku e nisi aventurën turke.
