Sulmuesi i Kombëtares shqiptare, Rey Manaj, ka marrë vendimin për t’u larguar nga skuadra e Sivassporit pas një periudhe të shkurtër dhe plot ndryshime në kampionatin turk.
Futbollisti i habiti të gjithë kur vendosi të ndërpriste kontratën me klubin Al Sharjah në Emiratet e Bashkuara Arabe, duke hequr dorë nga një përfitim i lartë financiar për t’u rikthyer në Turqi. Pasi u bashkua sërish me Sivassporin, ai pësoi një dëmtim serioz që e la jashtë fushave të lojës për fazën e fundit të sezonit aktual. Kjo mungesë ndikoi në mënyrë në performancën e ekipit, i cili dështoi të siguronte një vend në fazën “Play-Off” për ngjitjen në Superligën turke.
Rrethanat brenda klubit janë ndërlikuar edhe më tej pas dorëheqjes zyrtare të presidentit dhe të gjithë bordit drejtues të Sivassporit gjatë ditëve të fundit. Ky zhvillim ka shtyrë edhe sulmuesin shqiptar të bëjë gati largimin, duke e bërë të qartë se nuk dëshiron të aktivizohet në kategorinë e dytë gjatë edicionit të ardhshëm.
Menaxherët e lojtarit kanë nisur punën për gjetjen e një destinacioni të ri, ku interesim të parë kanë shfaqur disa skuadra elitare të Superligës turke. Megjithatë, mbetet për t’u qartësuar nëse kontrata e tij aktuale lejon një zgjidhje të njëanshme apo nëse drejtuesit e rinj të klubit do të kërkojnë dëmshpërblim financiar për kartonin e tij.
