Milan po përgatitet për javët vendimtare të sezonit, ndërsa në qendër të vëmendjes mbetet situata e Luka Modric. Mesfushori kroat mungoi në dy humbjet radhazi të skuadrës kuqezi ndaj Sassuolo-s dhe Atalantës, rezultate që kanë komplikuar objektivin për kualifikimin në Champions League.
Dëmtimi i Modric erdhi në sfidën ndaj Juventusit në San Siro. Në minutat e fundit të ndeshjes, kroati u përplas fort me Manuel Locatellin dhe pësoi frakturë te pjesa e mollëzave. Pas këtij incidenti, lojtari u detyrua të ndalonte aktivitetin dhe të mungonte në ndeshjet e radhës të skuadrës së drejtuar nga Massimiliano Allegri.
Në mungesë të tij, Milani u mposht fillimisht nga Sassuolo dhe më pas nga Atalanta, duke humbur terren në garën për një vend në Champions. Modric konsiderohet një nga lojtarët kyç të skuadrës, jo vetëm për eksperiencën, por edhe për rolin në organizimin e lojës në mesfushë.
Sipas mediave italiane, kroati po përpiqet të rikthehet sa më shpejt në dispozicion të ekipit. Objektivi i tij është të jetë prezent në sfidën e fundjavës ndaj Genoas në stadiumin Luigi Ferraris (Marassi), një ndeshje që konsiderohet shumë e rëndësishme për vazhdimësinë e sezonit të Milanit.
Përpara se të merret vendimi përfundimtar, Modric do t’i nënshtrohet një kontrolli mjekësor për të parë mënyrën si po avancon rikuperimi nga dëmtimi në fytyrë. Nëse përgjigjja e analizave do të jetë pozitive, ekziston mundësia që ai të grumbullohet të paktën për stolin.
Një nga opsionet që po shqyrtohet është aktivizimi i tij me maskë mbrojtëse në fytyrë, e ngjashme me atë që përdori më herët Victor Osimhen pas dëmtimit të tij. Megjithatë, vendimi final do të varet nga stafi mjekësor i Milanit dhe nga gjendja fizike e futbollistit.
Trajneri Allegri pret rikthimin e kroatit në një moment delikat të sezonit, me Milanin që vazhdon të luftojë për të siguruar pjesëmarrjen në Champions. Modric, nga ana tjetër, dëshiron të japë kontributin e tij në javët e fundit të kampionatit përpara se të diskutohet edhe e ardhmja e tij.
