Trajneri i Rumanisë, Mircea Lucescu, ka ngjallur panik në stërvitjen e fundit.
80-vjeçari pësoi një gjendje të fikëti gjatë një mbledhjeje teknike përpara nisjes drejt Sllovakisë. Ngjarja ndodhi në prani të lojtarëve, ndërsa ndihma e parë iu dha nga asistenti i tij, Florin Constantinovici.
Ai u stabilizua nga mjekët dhe u transportua në spital në Bukuresht. Sipas diagnozës, bëhet fjalë për një gjendje të shkaktuar nga lodhja dhe stresi, jo për problem kardiak.
Gjendja e tij aktuale paraqitet e qëndrueshme dhe ndodhet nën monitorim mjekësor. Lucescu nuk do të jetë në pankinë për ndeshjen miqësore në Sllovaki.
Ai ka deklaruar se ndihet më mirë, por vijon të kryejë teste, ndërsa kishte paralajmëruar më herët se do të vazhdonte të drejtonte skuadrën në play-off pas 28 vitesh mungese nga Botërori.
