Shqipëria do të përballet me Serbinë më 11 tetor në qytetin e Leskovacit, në një ndeshje vendimtare për rrugëtimin në kualifikueset e Kupës së Botës.
Përballja ka rëndësi të veçantë jo vetëm në aspektin sportiv, por edhe për shkak të marrëdhënieve të tensionuara politike mes dy vendeve.
Ngjarjet e vitit 2014, kur ndeshja në Beograd u ndërpre pas incidentit me dronin dhe iu dha fitorja në tavolinë Shqipërisë, mbeten ende një pikë referimi për këtë duel.
Federata Shqiptare e Futbollit ka ndërmarrë masa të posaçme për menaxhimin e situatës përpara kësaj sfide.
Sipas “Panorama Sport”, lojtarëve të Kombëtares u është kërkuar të shmangin intervistat dhe të mos japin deklarata që lidhen me Serbinë.
Ky vendim është marrë për të shmangur çdo reagim apo koment që mund të interpretohet si provokim.
Shpesh herë emocionet e momentit kanë bërë që lojtarët të shprehen me tone patriotike, gjë që në këtë rast kërkohet të evitohet.
Një faktor tjetër që i jep peshë situatës është edhe fakti që Shqipëria dhe Serbia do të jenë bashkëorganizatore të Europianit U-21 në vitin 2027.
Kjo e bën të domosdoshme ruajtjen e një klime sa më të qetë në prag të ndeshjes së tetorit.
