Projekti i dy viteve më parë i klubeve më të mëdhenj të Europës për krijimin e Super Ligës, një turne që do të konkurronte Champions nuk është shuar.
Të paktën jo plotësisht. Ndryshojnë vetëm modalitetet dhe aktorët, por në thelb ideja është e njëjtë.
Sipas mediave spanjolle pranë Real Madrid, tashmë projektin e ka marrë në dorë vetë UEFA, e cila po bisedon me klubet mbështetës të Super Ligës për të krijuar një kompeticion të ri, ose më saktë me një format të ndryshëm, duke nisur nga vitit 2027.
Emri nuk do të ndryshojë, pra do të titullohet Champions League, ndërsa do të marrin pjesë 36 skuadrat e para në renditjen e UEFA.
Ndryshe nga formati aktual i turneut, ekipet do të ndahen sipas klasifikimit në dy grupe. 18 skuadrat e para dhe 18 të dytat, që mes tyre do të zhvillojnë edhe fazën e ligës sipas të njëjtit model me të cilin luhet tani turneu më i rëndësishëm i futbollit europian për klube.
Por ajo që bie më shumë në sy dhe është pika ku bashkohen më së shumti UEFA dhe klubet ka të bëjë me financat.
Për të rritur përfitimet e këtij turneu, ashtu siç kërkonin klubet kur kërcënuan me krijimin e Super Ligës, të drejtat televizive nuk do t’iu shiten më televizioneve apo platformave televizive.
Ndeshjet do të transmetohen direkt në një platformë të modelit Netflix, ku tifozët mund t’i ndjekin falas apo duke paguar një shifër modeste.
Nëse ky projekt merr jetë, atëherë Champions League do të ndryshonte nga themelet për të dytën herë brenda pak vitesh.
