Klubi i Beshiktashit ka marrë një vendim lidhur me të ardhmen e mesfushorit shqiptar Kristjan Asllani.
Sipas raportimeve të fundit nga mediat turke, drejtuesit e klubit nuk do të investojnë për blerjen e kartonit të tij.
Trajneri Sergen Jalçin, i cili fillimisht e kërkoi lojtarin në ekip, nuk e ka përfshirë atë në planet për sezonin e ardhshëm.
Pavarësisht se 24-vjeçari është aktivizuar shpesh si titullar, performancat e tij nuk kanë qenë bindëse për stafin teknik.
Kjo situatë detyron mesfushorin e Kombëtares që të rikthehet te klubi i Interit pas përfundimit të huazimit.
Megjithatë, as zikaltrit nuk duken të gatshëm për ta mbajtur në organikë, duke konsideruar një tjetër huazim ose shitje të mundshme. Ky vit ka qenë mjaft sfidues për karrierën e Asllanit në arenën ndërkombëtare.
Përpara eksperiencës në Turqi, lojtari ishte pjesë e ekipit të Torinos gjatë fazës së parë të kampionatit. Tashmë pritet të shihet se cili do të jetë destinacioni i ri për mesfushorin gjatë afatit kalimtar të verës.
