Situata te Partizani vijon të mbetet e tensionuar pas shkarkimit të papritur të trajnerit Oltijon Kërnaja.
Vetëm një ditë pas largimit të teknikut, i cili erdhi si pasojë e rezultateve zhgënjyese dhe rrezikimit të objektivit “Final Four”, klubi i kuq ka marrë një tjetër vendim drastik.
Përpara ndeshjes tejet të rëndësishme kundër Flamurtarit, drejtuesit kanë vendosur të mbyllin dyert për mediat, duke anuluar konferencën zyrtare për shtyp.
Kjo heshtje pwr shtyp vjen në një moment kritik, kur skuadra po përgatitet për duelin e nesërm në shtëpi nën drejtimin e Agim Ibraimit. Drejtori sportiv do të mbajë rolin e trajnerit deri në fund të këtij sezoni, me shpresën për të rikthyer qetësinë dhe për të siguruar kualifikimin në fazën finale.
Heshtja e përzgjedhur nga klubi tregon përqendrimin maksimal, ose presionin e lartë, që rrethon kampin e “Demave” në këto tri javë të mbetura të kampionatit.
