Armando Broja mund të nisë një kapitull të ri në karrierën e tij, këtë herë në Serinë A. Sulmuesi i Kombëtares shqiptare ka përfunduar në shënjestrën e dy klubeve italiane, Udinese dhe Parma.
Sipas mediave italiane, interesi për 24-vjeçarin është rikthyer pasi skuadra e tij aktuale, Burnley, ka rënë zyrtarisht nga kategoria në futbollin anglez.
Ndonëse Burnley pagoi 23 milionë euro verën e kaluar për kartonin e tij dhe i ofroi një kontratë deri në vitin 2030, sezoni i Brojës ka qenë i vështirë.
Për shkak të dëmtimeve të shumta, ai nuk arriti të gjente vazhdimësinë, duke shënuar vetëm 1 gol në kampionat. Klubi anglez tashmë raportohet i gatshëm për ta sakrifikuar sulmuesin në merkaton e verës.
Nga ana tjetër, vetë Broja është në kërkim të një skuadre që i garanton minuta, dhe kampionati italian shihet si mjedisi ideal për të shfaqur cilësitë e tij.
