Ernest Muçi ka reaguar zyrtarisht në rrjetet sociale pas publikimit të listës së Kombëtares shqiptare nga trajneri Rolando Maran, ku emri i tij ra në sy si një nga mungesat më të rëndësishme.
Ish-futbollisti i Tiranës ka konfirmuar njoftimin e dhënë më herët nga Federata Shqiptare e Futbollit, duke sqaruar se arsyeja e mospërfshirjes së tij lidhet me një problem fizik.
Lojtari aktual i Trabzonsporit u shpreh i keqardhur që nuk do të mund të kontribuojë në dy sfidat miqësore të muajit qershor, teksa shfrytëzoi rastin për t’i uruar suksese pjesës tjetër të skuadrës dhe teknikut të ri në këto dy teste.
“Më vjen keq që nuk munda të jem pjesë e Kombëtares për dy miqësoret, për shkak të një dëmtimi. I uroj suksese çunave dhe trajnerit Maran në këto dy sfida. Shihemi së shpejti. Forca Shqipëri”, shkruan Muçi.
