Elversberg
Elversberg ka shkruar historinë në futbollin gjerman, duke siguruar për herë të parë ngjitjen në Bundesliga. Skuadra që përfaqëson një qytet të vogël me rreth 13 mijë banorë e mbylli sezonin në vendin e dytë të Bundesliga 2, pas një suksesi të pastër 3-0 në shtëpi ndaj Preussen Münster.
Ekipi i drejtuar nga Vincent Wagner arriti objektivin më të madh që prej themelimit të klubit, vetëm dy vite pasi ishte ngjitur për herë të parë në kategorinë e dytë gjermane. Pas zhgënjimit të madh të sezonit të kaluar, kur humbi mundësinë e promovimit në fazën “play-off”, Elversberg këtë herë nuk lejoi surpriza në ndeshjet shtesë dhe siguroi biletën direkte për në elitën e futbollit gjerman.
Fitorja ndaj Preussen Münster rezultoi vendimtare në javën e fundit të kampionatit. Me këtë sukses, Elversberg e mbylli sezonin me pikë të barabarta me Paderborn-in, por përfitoi nga golavarazhi më i mirë. Diferenca e golave në fund ishte saktësisht elementi që ndau dy skuadrat në renditje dhe i dha Elversberg-ut promovimin historik direkt në Bundesliga.
Nga ana tjetër, Paderborn do të kërkojë ngjitjen përmes fazës “play-off”, ku do të përballet me Wolfsburg-un. Për Paderborn-in, kjo mbetet mundësia e madhe për t’u rikthyer në elitë pas gjashtë vitesh mungesë. Një tjetër zhgënjim ishte ai i Hannover-it, që humbi mundësinë për t’u ngjitur direkt pasi barazoi 3-3 ndaj Nürnberg-ut në minutat e fundit, duke përfunduar në vendin e katërt.
Ndërkohë, drama nuk mungoi as në fundin e tabelës së klasifikimit. Fortuna Düsseldorf ra zyrtarisht në kategorinë e tretë (3. Liga) pas humbjes 3-0 ndaj Greuther Fürth. Situata në mbijetesë u komplikua tej mase nga fakti se tre skuadra e mbyllën sezonin me pikë të barabarta. Greuther Fürth, pas suksesit ndaj Düsseldorf-it, siguroi gjithashtu një vend në “play-off”-in e mbijetesës, ku do të përballet me Rot-Weiss Essen për të qëndruar në kategorinë e dytë.
