Sfida e Kategorisë Superiore mes Bylisit dhe Dinamos në Ballsh është karakterizuar nga një pjesë e dytë mjaft e tensionuar, ku të dyja ekipet e mbyllën ndeshjen me dhjetë lojtarë.
Fillimisht, vendasit mbetën me një futbollist më pak pas ndëshkimit me karton të kuq të Fabjan Përndrecës. Megjithatë, kjo epërsi numerike për kryeqytetasit zgjati pak, pasi Bakari Gudiabi i Dinamos u largua gjithashtu nga fusha pas dy kartonëve të verdhë të marrë brenda vetëm dy minutash.
Ky moment shkaktoi irritim të madh te kapiteni i bluve, Bruno Dita, i cili kritikoi ashpër shokun e skuadrës për papërgjegjshmërinë e treguar. Mes dy futbollistëve pati një përplasje verbale, ndërsa Dita tentoi ta largonte me shpejtësi Gudiabin nga fusha për të mos humbur kohë, duke qenë se Dinamo ndodhej në disavantazh.
Pas qetësimit të situatës, lojtari la ambientet e lojës duke rivendosur barazinë numerike në fushë.
