Pogradeci mposht Besën, sfidon Teutën për Superioren

Pogradeci është vetëm një hap larg rikthimit në Kategorinë Superiore pas fitores minimale ndaj Besës në finalen e “play-off”-it. Ndeshja u vendos pas 120 minutave lojë, pasi koha e rregullt përfundoi me rrjeta të paprekura pavarësisht rasteve të krijuara.

Golin vendimtar për skuadrën liqenore e shënoi Indio Oliveira në minutën e 105-të të shtesës. Takimi u karakterizua nga një tension i lartë, duke u mbyllur me tre kartonë të kuq të akorduar nga arbitri.

Kavajasit mbetën me nëntë lojtarë pas ndëshkimit të futbollistëve Bianor dhe Ayivi. Nga ana tjetër, te Pogradeci u largua me karton të kuq lojtari Kazeem.

Pas këtij suksesi, Pogradeci do të përballet me Teutën në finalen e madhe të “play-out”-it. Skuadra durrsake vjen në këtë përballje pasi u rendit në vendin e tetë të Kategorisë Superiore.

Ky është viti i dytë radhazi që Pogradeci arrin në këtë fazë vendimtare të kompeticionit. Vitin e kaluar, ata u mposhtën minimalisht nga Tirana, por këtë herë kërkojnë një rezultat tjetër.

Fituesi i këtij dueli do të sigurojë të drejtën për të luajë në elitën e futbollit shqiptar sezonin e ardhshëm.