Ekspertët e statistikave të OPTA kanë publikuar parashikimin e tyre të detajuar për përballjen historike mes Polonisë dhe Shqipërisë, duke u bazuar në 10 mijë simulime të kryera nga superkompjuteri i tyre.
Sipas të dhënave, Shqipëria niset në disavantazh në këtë transfertë të vështirë në Varshavë. Polonia vlerësohet me një probabilitet fitoreje prej 56,6% brenda 90 minutave, e favorizuar nga forma e lartë në kualifikuese ku grumbulloi 17 pikë, duke mbetur vetëm pas Holandës.
Nga ana tjetër, shanset e kuqezinjve për një sukses direkt vlerësohen në masën 20,9%. OPTA vëren se ndonëse Shqipëria bëri histori duke lënë pas Serbinë në grup, totali prej 14 pikësh ishte më i ulëti mes vendeve të dyta.
Edhe pse rruga drejt Botërorit të parë është vetëm dy ndeshje larg, statistikat tregojnë se djemtë e Silvinjos kanë një mal për të ngjitur, duke pasur parasysh eksperiencën më të madhe të polakëve në nivele të tilla.
Ky parashikim vendos gjithë presionin mbi vendasit, ndërsa Shqipëria kërkon të thyejë çdo llogari matematikore në fushën e lojës këtë të enjte.
