Dinamo pësoi një humbje të hidhur në “play off” të Conference League, ku u mposht me rezultatin 3-0 nga polakët e Jagiellonias. Në qendër të kritikave ka përfunduar reparti i mbrojtjes së bluve, që në Europë këtë verë ka lënë shumë për të dëshiruar.
Dinamo ka bërë shitje të rëndësishme, por edhe afrime të bujshme në emra. Megjithatë, drejtuesit kanë dështuar në afrimin e një lojtari që mund të ndihmojë në prapavijë.
Para pak ditësh, “Vetëm Sport” zbuloi ekskluzivisht se Dinamo kishte kontaktuar ish-mbrojtësin e Skënderbeut, Jorgo Pëllumbi. Korçari njihet mirë nga trajneri Ilir Daja, nga koha te juglindorët.
Megjithatë, bisedimet nuk avancuan dhe nuk është e qartë pse negociatat nuk u konkretizuan.
Me siguri te Dinamo do të jenë bërë “pishman” për mostransferimin e Pëllumbit, i cili për shkak të eksperiencës do të ishte një ndihmesë e madhe për ekipin, në objektivin historik që ishte kualifikimi në grupe.
Pyetja që lind është nëse fajin për dështimin e transferimit e kanë drejtuesit e klubit apo vetë përfaqësuesit e lojtarit?! Këto pritet të zbulohen në vijim…
