Pas fitores së Superkupës së Shqipërisë, ku Dinamo mposhti Egnatian me rezultatin 3-1, presidenti i klubit dinamovit, Adrian Bardhi, ka folur për ecurinë e skuadrës dhe planet për merkaton e janarit.
Në prononcimin e tij, kreu i klubit kryeqytetas vlerësoi vitin e mbyllur dhe rolin e trajnerit Ilir Daja në këtë sukses, duke theksuar se vetë afrimi i teknikut ishte lëvizja më e rëndësishme.
“Ishte një vit shumë i bukur dhe plot surpriza, do të vazhdojmë që ta çojmë gjithmonë më mirë, duke filluar besoj edhe nga merkatoja. Besoj se ardhja e Dajës për mua është bërë një merkato,” u shpreh Bardhi.
Lidhur me përforcimet e mundshme gjatë dritares së dimrit, veçanërisht në repartin e avancuar, presidenti Bardhi konfirmoi gatishmërinë e klubit për të plotësuar kërkesat e stafit teknik, pavarësisht vështirësive që paraqet tregu i janarit.
“Daja është shprehur se duhet një sulmues i duhur, gjë e cila nuk është e lehtë në janar, pasi e dimë se janari nuk sjell prurje të mira. Jo 1, po 2 po të jetë puna i marrim, por është pak e vështirë edhe lidhur kjo me modelin që luan ekipi,”deklaroi Bardhi.
