Milani po shkon drejt një vere me ndryshime të mëdha në strukturën drejtuese dhe sportive të klubit. Ndeshja ndaj Cagliarit, e programuar në fundjavë, konsiderohet vendimtare jo vetëm për objektivin e Champions Ligës, por edhe për të ardhmen e projektit kuqezi. Vetëm pak orë pas këtij takimi pritet të nisë zyrtarisht një fazë e re, ku drejtuesit do të marrin vendime të rëndësishme për organizimin e sezonit të ardhshëm.
Sipas raportimeve nga Italia, një nga largimet më të rëndësishme pritet të jetë ai i administratorit aktual Giorgio Furlani. Edhe pse prej kohësh ka qenë një nga figurat kryesore të menaxhimit të klubit, drejtuesit duket se kanë vendosur të ndryshojnë strukturën organizative. Procesi për zgjedhjen e administratorit të ri po drejtohet nga Massimo Calvelli, pjesëtar i bordit të klubit dhe bashkëpunëtor i afërt i pronarit Gerry Cardinale.
Situata mbetet e paqartë edhe për Igli Taren. Drejtori sportiv shqiptar, që u afrua me pritshmëri të larta, mund të largohet pas vetëm një sezoni në klub. Edhe Zlatan Ibrahimovic nuk e ka të garantuar të ardhmen në projektin e ri. Sipas mediave italiane, roli i suedezit si këshilltar i pronësisë mund të reduktohet ndjeshëm në muajt e ardhshëm.
Një tjetër çështje që po diskutohet është ajo e trajnerit Massimiliano Allegri. Tekniku italian mbetet i fokusuar te sfida ndaj Cagliarit, por e ardhmja e tij ende nuk është e sigurt. Kontrata e Allegrit parashikon rinovim automatik edhe për një sezon tjetër në rast se Milani siguron pjesëmarrjen në Champions Ligë. Megjithatë, kjo nuk do të thotë domosdoshmërisht se ai do të vazhdojë në pankinën kuqezi.
Në Itali vazhdojnë spekulimet për një interes të mundshëm të kombëtares italiane ndaj Allegrit. Trajneri thuhet se është i intriguar nga mundësia për të marrë drejtimin e “Azzurrëve”, por për të qëndruar te Milani kërkon garanci të forta sportive dhe financiare. Në rast të kualifikimit në Champions, kalendari i skuadrës do të bëhej më i ngarkuar dhe tekniku pret përforcime të rëndësishme në merkato.
Pavarësisht diskutimeve për të ardhmen, fokusi aktual i skuadrës mbetet vetëm te ndeshja ndaj Cagliarit. Milani synon të sigurojë objektivin minimal të sezonit dhe më pas të nisë menjëherë punën për ndërtimin e projektit të ri.
