Milani po hyn në një fazë të re ndryshimesh, me pronarët që po përgatisin një riorganizim të plotë të strukturës sportive dhe menaxheriale. Në qendër të këtij projekti të ri pritet të jetë Zlatan Ibrahimovic, i cili po fiton gjithnjë e më shumë pushtet brenda klubit kuqezi.
Gjithçka është diskutuar gjatë një takimi të zhvilluar në Londër mes pronarit Gerry Cardinale dhe drejtuesve të Milanit. Në këtë mbledhje janë analizuar rezultatet e sezonit aktual, situata sportive e skuadrës dhe strategjia për të ardhmen. Mungesa e sigurisë për një vend në Champions League sezonin e ardhshëm ka shtuar presionin mbi drejtuesit dhe ka përshpejtuar procesin e ndryshimeve.
Deri tani, Ibrahimovic kishte një rol si këshilltar i RedBird dhe ishte i pranishëm pranë skuadrës në Milanello, por pa kompetenca të plota operative. Sipas raportimeve të fundit, suedezi pritet të marrë drejtimin e plotë të sektorit sportiv dhe të ketë ndikim të drejtpërdrejtë në vendimet më të rëndësishme të klubit.
Ibrahimovic do të ketë rol vendimtar në strategjinë e merkatos, në menaxhimin e grupit dhe në zgjedhjen e figurave kryesore të projektit sportiv. Kjo lëvizje pritet të ndryshojë edhe balancat brenda klubit, pasi kompetencat sportive do të largohen pjesërisht nga administratori Giorgio Furlani.
Pozicioni i këtij të fundit është në vlerësim nga drejtuesit e klubit, ndërsa organizimi i ri mund të sjellë ndryshime të tjera.
Një tjetër çështje e rëndësishme lidhet me pankinën kuqezi. Raportohet se marrëdhënia mes Ibrahimovic dhe trajnerit Massimiliano Allegri nuk është më e fortë dhe e ardhmja e teknikut livornez mbetet në dyshim. Sipas mediave italiane, largimi i Allegrit në fund të sezonit konsiderohet një skenar i mundshëm.
Ibrahimovic kërkon një Milan më agresiv dhe më konkurrues, me një projekt të ndërtuar për të ardhmen, por njëkohësisht me objektiva të menjëhershëm për trofe. Pikërisht për këtistë arsye, merkato e verës shihet si një moment vendimtar për klubin.
Drejtuesit synojnë të ndërtojnë një skuadër më të balancuar, duke ruajtur lojtarët kryesorë dhe duke afruar profile që mund të japin rezultat të menjëhershëm. Strategjia e re parashikon investime më të kujdesshme dhe afrime në repartet ku skuadra ka pasur më shumë probleme gjatë sezonit.
