Klubi i Egnatias ka nisur të projektojë lëvizjet e para në tregun e merkatos për të ndërtuar një organikë sa më solide për përfaqësimin në kompeticionet europiane, ku emri i parë në listën e dëshirave është ai i mesfushori Regi Lushkja.
29-vjeçari, i cili u transferua verën e kaluar në kampionatin iranian te skuadra e Tractor, po shqyrton seriozisht mundësinë e largimit për shkak të situatës së pasigurt dhe tensioneve gjeopolitike në rajon.
Drejtuesit rrogozhinas po tentojnë të shfrytëzojnë këtë moment për të rikthyer futbollistin në skuadër, duke parë që ai e njeh mjaft mirë ambientin, filozofinë e klubit dhe kërkesat e kampionatit shqiptar.
Pas suksesit në arenën vendase, Egnatia synon të hedhë një tjetër hap cilësor në arenën ndërkombëtare, dhe eksperienca e Lushkjas shihet si një element mjaft i vlefshëm për të përballuar ndeshjet me intensitet të lartë që e presin skuadrën gjatë muajve të verës.
