Lecce triumfoi minimalisht ndaj Fiorentinës në transfertë, në duelin e javës së 10-të. Vendimtar ishte mesfushori i Shqipërisë, Medon Berisha.
Futbollisti kuqezi shënoi golin e vetëm të takimit, për t’i dhënë 3 pikë të arta skuadrës së tij. Berisha shfrytëzoi një krosim nga e djathta dhe lëvizi bukur në zonë, për të shënuar golin e parë të takimit.
Për 22-vjeçarin, ky është goli i dytë sezonal në Serinë A në tetë ndeshje, ndërsa numëron edhe një asist.
Ky gol duket se ka vulosur edhe të ardhmen e trajnerit Stefano Pioli. Ai pritet të shkarkohet nga drejtimi i Fiorentinës, pasi në 10 javë nuk ka marrë asnjë fitore. Skuadra nga Firence renditet në vendin e parafundit, me vetëm katër pikë të grumbulluara.
Në krahun tjetër, Lecce ngjitet në vendin e 15-të me nëntë pikë.
Në duelin tjetër, Torino barazoi 2-2 ndaj Pisas në shtëpi. Në këtë takim, vendimtar ishte edhe Ardian Ismajli.
Mbrojtësi i Kombëtares, asistoi për Simeone në golin e parë, të shënuar në minutën e 42-të.
Vlen të përmendet se të gjithë golat e këtij takimi u shënuan në pjesën e parë, ku Pisa kaloi në avantazh të dyfishtë dhe Torino ia doli të rikuperojë.
