Sulmuesi nga Venezuela, Daniel Pérez, mund të jetë përforcimi më i ri i Vllaznisë për fazën e sulmit gjatë kësaj periudhe të merkatos.
24-vjeçari, i cili luan në qendër të repartit ofensiv, së fundmi ka qenë pjesë e skuadrës Nea Salamis, me të cilën arriti të shpallej kampion në kategorinë e dytë qipriote.
Gjatë edicionit të kaluar, ai u aktivizua në 15 ndeshje dhe shënoi gjashtë gola. Në të kaluarën, Pérez ka qenë pjesë e klubit të njohur belg Club Brugge në moshën 19-vjeçare, periudhë në të cilën vlera e tij në tregun e transferimeve llogaritej rreth 800 mijë euro.
Gjithashtu, lojtari ka marrë edhe një ftesë nga kombëtarja e Venezuelës, ndonëse nuk arriti të regjistronte minuta në fushë. Nëse bisedimet mbyllen me sukses, ai do të vihej menjëherë nën urdhrat e stafit teknik të kuqebluve.
