Milani e nis me probleme sezonin e ri. Rafael Leao nuk do të jetë i disponueshëm për ndeshjen e parë të kampionatit, që skuadra kuqezi do ta zhvillojë ndaj Cremoneses, ditën e shtunë më 23 gusht në orën 20:45.
Sulmuesi portugez u dëmtua të dielën e kaluar në përballjen e Kupës së Italisë kundër Barit dhe që prej asaj kohe situata e tij është mbajtur nën monitorim nga stafi mjekësor.
Këtë të martë, lojtari iu nënshtrua kontrolleve instrumentale për të përcaktuar shkallën e dëmtimit. Rezultatet e ekzaminimeve kanë konfirmuar një traumë elongative në pulpën e djathtë. Ky dëmtim do ta mbajë atë jashtë fushës në debutimin e Milanit në Serie A.
Gjendja e lojtarit do të vlerësohet ditë pas dite, me synimin që të rikuperohet në kohë për sfidën e radhës në kampionat, transfertën ndaj Lecce, e planifikuar për të premten më 29 gusht, po ashtu në orën 20:45.
Ndërkohë, situata e Leão-s nuk ndikon në lëvizjet e merkatos së Milanit, të cilat vazhdojnë normalisht. Klubi kuqezi është shumë pranë përfundimit të një marrëveshjeje të rëndësishme për shitjen e sulmuesit zviceran Noah Okafor. Palët kanë gjetur akordin ekonomik me Leeds United për një transferim që do të kapë vlerën e 21 milionë eurove, përfshirë bonuset.
Fillimisht, Milani kishte refuzuar një ofertë të parë prej 17 milionë eurosh, por pas negociatave intensive është gjetur zgjidhja e duhur për të dy klubet. Tashmë, procesi ndodhet në fazën e finalizimit, ku mbeten për t’u zgjidhur disa detaje burokratike, kryesisht të lidhura me mënyrat e pagesës.
