Kategoria e Parë po hyn në fazën e saj më “përvëluese”, ku java e 31-të mund të zgjidhë përfundimisht enigmën e ngjitjes në elitë.
Me të gjitha ndeshjet që luhen të dielën në orën 15:00, Skënderbeu mund të festojë ngjitjen në fund.
Korçarët presin Kastriotin me sytë nga Laçi, ku zhvillohet “finalja” mes vendit të dytë dhe të tretë. Një barazim në sfidën Laçi-Pogradeci, i kombinuar me një fitore të “bardhekuqve”, do të shpallte zyrtarisht Skënderbeun pjesë të Superiores për sezonin e ardhshëm.
Edhe pse korçarët kanë një kalendar zjarri në dy javët e fundit kundër ndjekësve direkt, avantazhi prej tre pikësh dhe forma e treguar i bën ata favoritët kryesorë për t’u rikthyer aty ku i takon traditës së tyre.
Për Laçin dhe Pogradecin, përballja e kësaj fundjave është shansi i fundit për të mbajtur presionin hapur deri në minutën e fundit.
