Mesfushori Ennur Totre është pranë transferimit te Skënderbeu.
Sipas raportimeve të fundit, 29-vjeçari pritet të vazhdojë karrierën e tij me ekipin korçar, ndonëse marrëveshja nuk është zyrtarizuar ende.
Lojtari nga Tetova ishte pa ekip që prej largimit të tij nga skuadra e Gjilanit. Kjo situatë i ka hapur rrugë drejtuesve të Skënderbeut për të shfrytëzuar mundësinë e transferimit të tij pa pagesë.
Mesfushori e ka nisur karrierën te Shkëndija e Tetovës, për të vazhduar më pas në Ukrainë me ekipin e Vorskla Poltava. Në të kaluarën e tij, Totre është aktivizuar gjithashtu në Turqi te Sakaryaspori si dhe në Kosovë me Gjilanin.
29-vjeçari ka përvojë edhe në kampionatin shqiptar, ku me fanellën e Tiranës arriti të shpallej kampion në edicionin 2021/2022. Ardhja e tij pritet të sjellë më shumë përvojë në repartin e mesfushës për korçarët.
