Ndryshim i rëndësishëm në zhvillimet rreth pankinës së Skënderbeut.
Megjithëse gjatë ditës së sotme u përfol emri i Oltjon Kërnajës, drejtuesit e klubit juglindor kanë bërë një kthesë të papritur duke arritur akordin përfundimtar me teknikun elbasanas, Julian Ahmataj.
Burime pranë klubit bardhekuq konfirmojnë se marrëveshja mes palëve është mbyllur plotësisht dhe tashmë pritet vetëm zyrtarizimi nga ana e presidencës.
Ahmataj, i cili ka një karrierë të pasur në futbollin shqiptar duke drejtuar më parë skuadra si Tirana, Teuta, Kukësi e Luftëtari, vjen në Korçë për të zënë vendin e lënë bosh pas largimit të Ernest Gjokës.
Tekniku 46-vjeçar vlerësohet nga drejtuesit për eksperiencën e tij në Kategorinë Superiore dhe aftësinë për të menaxhuar grupe lojtarësh me pretendime të larta.
Me emërimin e tij, Skënderbeu mbyll përfundimisht dilemat e stolit dhe bëhet gati të ndezë motorët për merkaton e verës dhe përgatitjet për edicionin e ri.
