Epoka e Rolando Maran në krye të Kombëtares shqiptare të futbollit sapo ka filluar zyrtarisht, duke sjellë një frymë të re dhe pritshmëri të mëdha te sportdashësit kuqezi. Tekniku italian mori “frenat” e skuadrës ditën e mërkurë, ku u prezantua përpara mediave.
Menjëherë pas prezantimit, 62-vjeçari do të nisë punën në terren për përzgjedhjen e futbollistëve më në formë të momentit. Ky grumbullim i parë do të shërbejë për të përgatitur dy sfidat miqësore që Shqipëria do të zhvillojë përballë Izraelit më 3 qershor dhe Luksemburgut më 6 qershor.
Në “lupën” e trajnerit të ri kanë përfunduar menjëherë një sërë talentesh të cilët luajnë në kampionate të ndryshme evropiane. Strategjia e Maran bazohet në pikasjen e lojtarëve që nuk kanë marrë ende minuta me përfaqësueset e tjera, duke u ofruar atyre mundësinë e artë për të veshur fanellën kuqezi.
Mes shumë emrave që po vëzhgohen me kujdes, spikat padyshim mbrojtësi shtatlartë Ron Raçi. Futbollisti, i cili aktualisht aktivizohet në kampionatin kroat me skuadrën e Hajdukut të Splitit, nuk ka zhvilluar ende asnjë paraqitje zyrtare me përfaqësuesen e Kosovës.
Për këtë arsye, Federata Shqiptare e Futbollit ka nisur kontaktet dhe po përpiqet ta bindë djaloshin që të përfaqësojë ngjyrat e Shqipërisë në arenën ndërkombëtare.
Raçi luan në qendër të mbrojtjes dhe zotëron një këmbë të majtë mjaft të saktë, cilësi këto që aktualisht i mungojnë repartit defensiv të kombëtares sonë. Për sa i përket të kaluarës së tij, mbrojtësi ka spikatur më herët edhe në futbollin vendor duke u aktivizuar me klube si Trepça, Prishtina, Besa e Pejës dhe Ramiz Sadiku.
Mbetet për t’u parë nëse ky profil interesant do të jetë risia e parë e listës së Maran për ndeshjet e muajit qershor.
