Humbja ndaj Fiorentinës ka futur Juventusin në një moment të vështirë, ku objektivi për kualifikimin në Champions League duket gjithnjë e më i komplikuar. Disfata ndaj skuadrës vjollcë ka krijuar pasiguri brenda klubit bardhezi dhe ka vënë në diskutim projektet për sezonin e ardhshëm. Sinjali i parë erdhi nga Giorgio Chiellini, i cili dha shenja largimi pas përfundimit të kampionatit.
Në qendër të vëmendjes ka përfunduar edhe Luciano Spalletti. Trajneri i Juventusit vetëm pak javë më parë rinovoi kontratën deri në vitin 2028, por rezultatet e fundit kanë ndryshuar ndjeshëm situatën. Vetë tekniku italian nuk e ka fshehur zhgënjimin pas humbjes ndaj Fiorentinës dhe ka deklaruar se nëse skuadra nuk arrin nivelin e pritur, atëherë ai është i primi që duhet të vihet në diskutim.
Kjo deklaratë ka shtuar dyshimet mbi vazhdimësinë e tij në stolin bardhezi, pavarësisht marrëveshjes së re të firmosur në fillim të muajit prill. Në Itali raportojnë se gjatë një takimi me John Elkann, Spalletti ka paraqitur disa kërkesa të rëndësishme për të vazhduar projektin te Juventusi. Mes tyre përmenden ndërhyrjet në merkato, më shumë autonomi në menaxhimin sportiv dhe një rol më i zgjeruar në vendimmarrjet që lidhen me skuadrën. Aktualisht, një pjesë e këtyre kompetencave lidhen me figurën e Damien Comolli-t, çka duket se nuk e bind plotësisht trajnerin.
Sipas raportimeve, Spalletti ka kërkuar gjithashtu mbështetje totale nga drejtuesit e klubit. Çdo dyshim mbi projektin teknik mund ta shtyjë trajnerin të bëjë një hap pas, madje edhe duke hequr dorë nga dy vitet e mbetura të kontratës së tij.
Në këtë situatë, Juventusi po vlerëson edhe skenarë alternativë për pankinën. Emri që përmendet më shumë është ai i Antonio Conte-s. Ish-trajneri bardhezi pritet të largohet nga Napoli në fund të sezonit dhe mbetet një nga profilet më të vlerësuara nga ambienti juventin.
Conte ishte pranë rikthimit në Torino edhe sezonin e kaluar, por në fund zgjodhi projektin e Napolit pas garancive sportive dhe merkatos së premtuar nga Aurelio De Laurentiis. Tashmë, me raportin mes Conte-s dhe Napolit që duket drejt fundit, mundësia e rikthimit te Juventusi po fiton gjithnjë e më shumë terren.
Për momentin nuk ka asnjë vendim zyrtar, por gjithçka mbetet e hapur. Juventusi do të përqendrohet fillimisht te objektivi për të siguruar një vend in Champions League, ndërsa më pas pritet të merren vendimet përfundimtare për drejtimin teknik dhe projektin e ri sportiv të klubit.
