Klubi i Tiranës ka zyrtarizuar afrimin e mbrojtësit Patrik Stanic për të përforcuar repartin e prapavijës për sezonin e ri.
Përmes një njoftimi në faqen zyrtare, bardheblutë bënë me dije se 25-vjeçari kroat i është bashkuar skuadrës kryeqytetase.
Shtatlarti që luan si qendërmbrojtës vjen te Tirana pas përvojës me NK Siroki Brijeg në kampionatin boshnjak. Më herët gjatë karrierës së tij, Stanic ka mbajtur veshur edhe fanellat e NK Zrinski Osjecko 1664, NK Osijek II dhe HNK Cibalia.
Në CV-në e tij numërohen 112 paraqitje në futbollin kroat si dhe 50 sfidave të zhvilluara në elitën e Bosnjë-Hercegovinës. Drejtuesit e klubit shpresojnë se përvoja e tij do të sjellë më shumë stabilitet dhe cilësi në mbrojtje. Me këtë lëvizje, bardheblutë vazhdojnë punën intensive për konsolidimin e grupit në merkato.
