Partizani U-19 është shpallur kampion i Shqipërisë, duke siguruar zyrtarisht pjesëmarrjen në kualifikueset e “UEFA Youth League” për edicionin e ardhshëm.
Titulli u vulos pas fitores bindëse 4-1 ndaj Skënderbeut U-19, në një sfidë ku “Demat” e drejtuar nga Fatjon Muhameti dominuan totalisht.
Abdu Sarjo hapi serinë e golave, i ndjekur nga një dopietë e kapitenit Erald Rrenga dhe goli i Neid Banushit, ndërsa për korçarët shënoi Flavio Shkëmbi.
Në përfundim të garës, Partizani e mbylli kampionatin me një avantazh prej 4 pikësh ndaj ndjekësit më të afërt, Laçit U-19.
Ky sukses i jep mundësinë akademisë së kuqe të përfaqësojë Shqipërinë në kompeticionin më prestigjioz europian për grupmoshat.
Synimi kryesor i klubit përgjatë gjithë sezonit ishte pikërisht fitimi i trofeut dhe dalja në arenën ndërkombëtare.
