Një lajm i publikuar nga gazeta e njohur “The Times” ka trazuar së fundmi botën e futbollit.
Bëhet fjalë për një plan të presidentit të FIFA-s, Gianni Infantino, i cili dëshiron t’u hapë rrugë investitorëve privatë. Sipas këtij projekti, biznesmenë të ndryshëm do të mund të blejnë aksione në një kompani që do të menaxhojë ndeshjet më të rëndësishme, përfshirë edhe Kupën e Botës.
Kjo nismë është cilësuar si një “bombë bërthamore” për futbollin nga një zyrtar i lartë i këtij sporti. Në lajm shkruhet se për këtë ide është pyetur edhe administrata e presidentit amerikan Donald Trump.
Si një nga investitorët kryesorë përmendet biznesmeni nga SHBA, Joshua Kushner. Ai është vëllai i Jared Kushner, i cili është i martuar me vajzën e Donald Trump, Ivanka. Deri më tani, nga ana e FIFA-s nuk ka patur ende asnjë reagim zyrtar për këtë lajm.
