Klubi i Skënderbeut ka regjistruar afrimin e parë për edicionin e ri futbollistik. Qendërmbrojtësi korçar Kevi Mejdani ka mbyllur përfundimisht bashkëpunimin me Kukësin dhe do të jetë pjesë e organikës bardhekuqe në Superiore.
Futbollisti i rritur në akademinë e klubit korçar ishte i huazuar përgjatë sezonit të kaluar te verilindorët, ku fitoi një eksperiencë të rëndësishme duke u aktivizuar në 31 ndeshje zyrtare.
Mbrojtësi, i cili së fundmi ka qenë edhe pjesë e grumbullimeve të kombëtares shqiptare U-21, do të vihet nën urdhrat e trajnerit Julian Ahmataj për nisjen e fazës përgatitore.
Përveç këtij rikthimi, drejtuesit janë duke punuar për të konfirmuar tetë futbollistë të tjerë nga grupi i vitit të kaluar.
Përgatitjet verore të skuadrës janë programuar të startojnë zyrtarisht më 22 qershor, datë deri në të cilën pritet të zbulohen edhe emrat e tjerë të përzgjedhur nga stafi teknik për të përforcuar ekipin.
