Sezoni për Partizanin u mbyll me zhgënjim, pasi ekipi u rendit në vendin e pestë, duke mbetur jashtë zonës evropiane dhe pa fituar asnjë trofe.
Tashmë drejtuesit duhet të përqendrohen te ndërtimi i të ardhmes, në një kohë kur përballen me kontrata në skadencë. Aktualisht janë plot 11 lojtarë të cilët dalin të lirë pas përfundimit të këtij edicioni futbollistik.
Ndonëse për disa prej tyre ekziston një opsion për rinovimin, klubi i kuq ende nuk ka bërë asnjë zyrtarizim për vazhdimësinë. Në këtë listë përfshihen emra me peshë në skuadër dhe lojtarë që kanë mbajtur shiritin e kapitenit, si Alban Hoxha, Marcelino Preka dhe David Atanaskoski.
Reparti i mbrojtjes duket se është më i prekuri nga kjo situatë kontratash, pasi pa marrëveshje rezultojnë edhe Saliu Sembene, Altin Bytyçi, Albion Marku dhe Carlos Martinez.
Në mesfushë, situatë e ngjashme paraqitet për dy futbollistët Redon Ismaili dhe Amos Nondi, të cilët po ashtu presin të ardhmen. Ndërkaq, në repartin e avancuar, kontratat u përfundojnë sulmuesve Vusal Isgandarli dhe Albers Keko.
Me numrin dhe cilësinë e lojtarëve që janë në fundin e kontratës, mund të ndërtohej lehtësisht një skuadër e re. Ky grup lojtarësh do të ishte mjaft konkurrues në kampionat, duke filluar që nga porta e deri në majën e sulmit.
Mbetet në dorën e klubit të vendosë se cilët nga këta futbollistë do të rruhen në organikë për sezonin e ri.
