Jasir Asani ka realizuar golin e radhës për skuadrën iraniane të Esteghlalit në ndeshjen ndaj Fajr Sepasit.
Sulmuesi i Kombëtares shqiptare po kalon një formë të mirë, duke shënuar në tre takime radhazi. Ai zhbllokoi rezultatin në minutën e 42-të nga pika e bardhë e penalltisë. Pas golit, ndeshja u ndërpre për pak çaste për shkak të sendeve të hedhura në fushë nga tifozët vendas.
Situata u përsërit edhe pas golit të dytë të Esteghlalit, që erdhi sërish nga penalltia. Stadiumi ishte i mbushur plot, me një atmosferë të tensionuar.
Ky është goli i dytë i Asanit brenda javës, pas atij të shënuar në Champions-in aziatik. Anësori shqiptar duket se ka gjetur formën e tij më të mirë te klubi ku u transferua gjatë verës.
