Ndeshja midis Burrelit dhe Korabit, e vlefshme për javën e 23-të të Kategorisë së Parë, ka nisur me tensione të larta në stadiumin “Liri Ballabani”.
Që në minutën e 11-të të takimit, trajneri i matjanëve, Samuel Nikaj, është ndëshkuar me karton të kuq dhe është detyruar të lërë stolin.
Gjyqtari Mikele Dyrmishi nuk ka hezituar të largojë teknikun menjëherë pas protestave të këtij të fundit për një faull të shkaktuar nga ekipi i tij. Pavarësisht kësaj goditjeje në start, Burreli vazhdon të mbetet një nga surprizat më të këndshme të këtij sezoni.
Aktualisht, skuadra mban vendin e pestë në klasifikim dhe ka si objektiv kryesor sigurimin e një vendi në fazën “play-off”. Ky synim vjen pas suksesit të edicionit të kaluar, ku ekipi matjan ishte sërish protagonist në garën për ngjitje.
