Mirlind Daku e ka nisur me gol sezonin e ri në kampionatin rus, duke realizuar për Rubin Kazan ndaj Krasnodarit.
Sulmuesi i Kombëtares shqiptare shënoi në minutën e 12-të, pasi mori topin jashtë zonës, kaloi mes dy mbrojtësve dhe e dërgoi në rrjetë për avantazhin 1-0.
Daku konfirmoi edhe një herë rolin e tij të rëndësishëm në repartin ofensiv të Rubin Kazanit, pas një sezoni ku realizoi 10 gola në kampionat.
Në këtë ndeshje nga minuta e parë u aktivizuan edhe Nazmi Gripshi dhe Veldin Hoxha, ndërsa Dardan Shabanhaxhaj mungoi.
Ndërkohë, debutim me gol regjistroi Erald Maksuti me fanellën e Akhmat Groznit. Ish-sulmuesi i Flamurtarit u fut në lojë në minutën e 78-të dhe vetëm pesë minuta më vonë realizoi golin e barazimit 1-1 ndaj Lokomotivës së Moskës.
