Masat e sigurisë rreth ndeshjes miqësore mes Shqipërisë dhe Izraelit janë rritur në nivele ekstreme, duke përsëritur të njëjtin skenar të ndeshur edhe në përballjet e shkuara mes dy përfaqësueseve.
Federata Shqiptare e Futbollit ka shtuar numrin e personelit të sigurisë private, ndërsa në terren është vërejtur edhe një prani masive e forcave të policisë.
Plani i masave ka nisur të zbatohet që përpara konferencave zyrtare për shtyp dhe seancave stërvitore të dy ekipeve në ambientet e stadiumit.
Përveç rrethimit të impiantit nga uniformat e rëndit, trupat e specializuara kanë ushtruar kontrolle të imtësishme nëpër tribuna, duke përfshirë edhe përdorimin e qenve anti-eksploziv.
Procedurat e kësaj natyre kanë krijuar shpesh herë pakënaqësi në radhët e sportdashësve në të kaluarën për shkak të kontrolleve të pazakonta dhe vonesave në hyrjen e stadiumit.
