Mbrojtësi 29-vjeçar Eneo Bitri ka mbyllur zyrtarisht aventurën e tij në Hungari me skuadrën e Nyiregyhaza Spartacus.
Klubi “kuqeblu” njoftoi se kontrata e lojtarit, e cila skadonte më 30 qershor, nuk do të rinovohet, duke bërë që palët të ndajnë rrugët në mënyrë të ndërsjellë.
Pas eksperiencave të tij jashtë vendit me klube si Banik Ostrava, Valerenga, Cracovia dhe Gyor, shtatlarti shqiptar ka vendosur të rikthehet në elitën e futbollit vendas.
Bitri ka arritur prej javësh një marrëveshje totale me kampionët në fuqi të Egnatias, duke refuzuar kështu ofertën e ish-skuadrës së tij, Partizanit.
Zyrtarizimi te rrogozhinasit pritet të bëhet brenda pak ditësh, duke regjistruar një tjetër goditje të rëndësishme për mbrojtjen e tyre në prag të sfidave europiane.
