Klubi i Flamurtarit ka bërë një lëvizje interesante, duke prezantuar sot përforcimin e tyre më të ri që pritet të stabilizojë mesfushën.
Jacques Mbé, një mesfushor defensiv me shtetësi kamerunase, ka nënshkruar zyrtarisht me kuqezinjtë dhe është vënë menjëherë nën urdhrat e trajnerit Francesco Moriero.
26-vjeçari vjen në Vlorë pas eksperiencës së tij të fundit në kampionatin algjerian me skuadrën e CR Belouizdad, ndërsa që prej verës kishte mbetur pa ekip.
Megjithëse ishte pa angazhim së fundmi, Mbé mbërrin në Kategorinë Superiore me një reputacion të lartë, pasi kartoni i tij vlerësohet rreth 700 mijë euro në faqen e specializuar “Transfermarkt”. Kjo shifër e bën atë automatikisht një nga lojtarët me vlerën më të lartë tregtare në elitën e futbollit shqiptar për momentin.
Drejtuesit e Flamurtarit shpresojnë që eksperienca dhe fuqia fizike e kamerunasit të jenë çelësi për të nxjerrë ekipin nga zona e rrezikut dhe për të siguruar mbijetesën.
