Flamurtari ka zyrtarizuar dy afrime në këtë merkato dimri. Bëhet fjalë për Momcilo Raso dhe Leo Melo.
Mbrojtësi malazez dhe mesfushori brazilian janë bashkuar tashmë me grupin nën drejtimin e trajnerit Françesko Moriero.
Raso, i cili luan si qendërmbrojtës, transferohet në Vlorë pas përvojës së tij në Uzbekistan me ekipin e Lokomotiv Tashkent.
Ndërkohë, mesfushori ofensiv Leo Melo vjen te kuqezinjtë pas aktivizimit në Kategorinë Superiore me skuadrën e Egnatias.
Skuadra vlonjate renditet aktualisht në vendin e tetë me 18 pikë, në kuotë të barabartë me Bylisin. Këto lëvizje në merkato synojnë të rrisin stabilitetin e ekipit për të siguruar qëndrimin në elitë. Te bregdetarët pritet të ketë lëvizje të tjera.
