Sulmuesi nigerian Peter Olayinka është prezantuar zyrtarisht si lojtari më i ri i klubit qipriot, APOEL. Ky transferim shënon një rikthim për 30-vjeçarin në kampionatin e Qipros, ku nisi karrierën e tij rreth 13 vite më parë.
Olayinka transferohet te APOEL si lojtar i lirë, pasi kishte mbetur pa ekip prej katër muajsh pas mbylljes së përvojës së tij të fundit. Përpara firmës në Qipro, sulmuesi ishte në bisedime me Karagumruk në Turqi, por marrëveshja nuk u finalizua.
Pavarësisht raportimeve për një rikthim të mundshëm në Shqipëri, kjo pistë u rrëzua për shkak të kërkesave të larta financiare të lojtarit.
Në një prononcim për “Vetëm Sport”, ish-lojtari i Skënderbeut dhe Bylisit deklaroi se në Shqipëri do të rikthehej vetëm për fanellën e klubit korçar.
Aktualisht, ai pritet të nisë një program të veçantë stërvitor për të rifituar formën fizike. APOEL e prezantoi afrimin e tij përmes një videoje në rrjetet sociale.
