Deivid Hoxha është zyrtarisht futbollisti më i ri i Egnatias pasi mbylli marrëveshjen me klubin grek Panetolikos.
Sulmuesi i lindur në vitin 2007 ishte pranë kalimit te Skënderbeu, por rrogozhinasit reaguan me shpejtësi duke siguruar shërbimet e tij.
Me një gjatësi prej 1.93 metrash, 19-vjeçari konsiderohet si një përforcim mjaft premtues për qendrën e sulmit. Lojtari i kombëtares Shqipëria U-19 shërben gjithashtu si një alternativë mjaft e vlefshme për të plotësuar rregullin e ri të FSHF-së.
Hoxha e ka provuar më parë emocionin e debutimit në Superligën greke me Panetolikos që gjatë sezonit 2024/25. Tashmë, talenti i ri do të vihet menjëherë nën urdhrat e trajnerit Nevil Dede për vazhdimësinë e kampionatit.
