Partizani ka ka bërë një lëvizje të papritur, duke shkarkuar trajnerin Oltijon Kërnaja vetëm tri javë përpara përfundimit të sezonit të rregullt.
Vendimi i marrë nga presidenca erdhi si një “rrufe në qiell të hapur” teksa skuadra po përgatitej për sfidën e radhës ndaj Flamurtarit. Humbja në derbi kundër Tiranës rezultoi fatale për teknikun, duke u bërë trajneri i dytë që shkarkohet nga stoli i të kuqve brenda këtij edicioni.
Përmes një komunikate zyrtare, klubi sqaroi se mbyllja e bashkëpunimit erdhi si pasojë e rezultateve zhgënjyese që kanë kompromentuar objektivat e sezonit, ku më kryesori mbetet pjesëmarrja në “Final Four” dhe kualifikimi në Europë.
Për pjesën e mbetur të kampionatit, skuadra nuk do të kërkojë një emër të ri, por do të drejtohet nga stafi teknik aktual, ku një rol kyç do të ketë edhe drejtori sportiv Agim Ibraimi.
Kjo lëvizje tregon qartë situatën e tensionuar te Partizani, ku presioni për rezultate ka arritur kulmin në metrat e fundit të garës.
