Mateo Çipi është zyrtarisht përforcimi më i ri i skuadrës së Orikut për sezonin e ri në Kategorinë e Parë.
Qendërmbrojtësi ka mbyllur aventurën e tij me Partizanin për të vazhduar karrierën te klubi vlonjat. Çipi i ishte bashkuar të kuqve në janar të vitit 2025, periudhë gjatë së cilës u aktivizua në dy ndeshje zyrtare.
Përmes një njoftimi në faqen zyrtare, Oriku shprehu kënaqësinë për arritjen e marrëveshjes me shtatgjatin e prapavijës. Klubi vlonjat thekson se mbrojtësi vjen për të forcuar repartin defensiv duke sjellë përvojën e tij nga ekipet e huaja dhe nga periudha te Partizani.
Drejtuesit e konsiderojnë atë si një lojtar të fuqishëm, inteligjent dhe një vlerë të shtuar për objektivat e sezonit. Me këtë lëvizje, Oriku merr një element të rëndësishëm për të konsoliduar prapavijën në kampionat.
