Katër ndeshjet e Kategorisë së Parë, të vlefshme për javën e nëntë, prodhuan 10 gola të shënuar.
Besa fitoi supersfidën ndaj Pogradecit, me rezultatin 3-2. Një sfidë tepër e luftuar në Kavajë, ku festa në fund ishte për vendasit.
Fatmir Prengaj i dha avantazhin verdhezinjve që në minutën e 2-të, pas një aksioni të shpejtë nga krahu i majtë.
Pjesa e parë u mbyll me këtë rezultat, ndërsa në të dytën vendasit shënuan edhe dy herë të tjera.
Ruzgis dyfishoi shifrat, pas një kundërsulmi të shpejtë në minutën e 69-të. Vetëm dy minuta më vonë, ishte Zekolli që dërgoi shifrat në 3-0.
Pogradeci nuk u dorëzua dhe rihapi sfidën në minutën e 82-të me Balliun. 3 minuta më vonë, Chinëendu realizoi të dytin për liqenorët, duke dhënë shpresë.
SHIKONI KLASIFIKIMIN: RENDITJA NË KATEGORINË E PARË
Megjithatë, rezultati nuk ndryshoi deri në fund, duke bërë që Besa të marrë një fitore të artë, që e ngjit në vendin e parë me 17 pikë.
Pogradeci zhytet në krizë, pasi kjo është ndeshja e katërt radhazi pa fitore. Skuadra juglindore ka zbritur në vendin e katërt me 14 pikë të grumbulluara.
Në duelet e tjera, Bylis fitoi 0-2 ndaj Burrelit në transfertë, ndërsa Besëlidhja mposhti 1-0 Orikun. Kastrioti mori një fitore të rëndësishme, duke mposhtur 2-0 Korabin.
